O luns 6 de febreiro ás 19 h., Rubén Pedreira presentará o seu libro "Zona de habitabilidad", publicado por VientoNorte Editorial, na Biblioteca Fórum Metropolitano.

Sinopse:

"Zona de habitabilidad" é a historia dun mozo galego que chega a Canarias na procura dun cambio de contorna que lle permita á súa cabeza evadirse dos seus problemas máis recorrentes. Entre eles destacan a ansiedade crónica que o acompaña desde hai anos e a sensación de que, tras terminar a súa formación universitaria, o seu presente non se parece en nada ao futuro que imaxinou ao empezar a súa carreira. As illas recíbeno cun emprego sen moito futuro, un compañeiro de piso cunha preocupante tendencia a xerar situacións surrealistas e a fiel amizade de Héctor, ao que coñece na súa nova oficina e que será clave para integralo na súa nova cidade, xa que o introduce no seu heteroxéneo círculo social. Na súa nova vida vai adquirindo unha familiaridade cada vez maior co novo contexto, mais pese a todo é incapaz de eliminar do seu interior todo aquilo que o levou ata alí. Non tardará moito en facerse unha pregunta demasiado incómoda: «Por que, se o cambiei case todo, son incapaz de cambiar o que me destrúe por dentro?».